മേഘങ്ങള്‍

നോക്കി നില്‍ക്കെ

മേഘങ്ങളെല്ലാം

ആകാശത്തിലൂടെ

നീങ്ങി നീങ്ങി പോകുന്നു

എവിടെയായിരിക്കും

തീരെ വേവലാതിയില്ലാതെ

ഒട്ടും തിടുക്കപ്പെടാതെയുള്ള

ആയാസരഹിതമായ യാത്രകള്‍

അവ ഒരുപക്ഷേ

അടുത്ത നിമിഷം

കണ്ണീരായി തീര്‍ന്നു പോകാം

അല്ലെങ്കില്‍

കാറ്റിന്റെ കൈകളില്‍ ഞെരിയാം

ഇടിമുഴക്കത്താല്‍

ചിതറിപ്പോവാം

പര്‍വ്വതങ്ങളില്‍ തട്ടി

തകര്‍ന്നു പോകാം

എങ്കിലും ഒന്നും ആലോചിക്കാതെ

എത്ര ശാന്തമായാണ്

അവ വഴികളത്രയും പിന്നിടുന്നത്.